நாஞ்சில் நாடன்

.

.

பொந்தும் உடைப்பும் அந்த சாலை

பிய்ந்த இருக்கையும் துருப்பிடித்த தகரமும்

ஒழுகலும் இல்லா

தாள் தள ,சொகுசு , தொடர் , குளிர் பதன

விரைவு , நகர்ப் பேருந்து

.

கசரும் குபையும் சாய்க்கடைத் தேங்கலும்

தவணையில் சாகும் கத்திருப்பும்

முற்றல் நோய் மாந்தரும் அற்ற

பொது மருத்துவமனை வளாகம்

.

மலக்குடல் நீள் புழு மிதப்பும்

உள்ளாடையில் துள்ளி விழும் தெறிப்புழுவும்

வெருட்டாத பொதுக் கழிப்பிடம்

.

அல்லில் ஆறு பகலில் ஆறுமாய்

பன்னிரு மணிக்கூர் மின் தடை அவல

சாபம் இலாத

நாழிகைக்கும் குறைவான மின் தடை

.

 உயர்கல்விச் சாலை

தமிழின் உயிர் காக்கும்

திரைத் தொழிற் கூடம்

யாவும்

இனிதே

அருளப் பெற

எனதருமைக் கிராமத்து மானுடனே

சலோ சென்னை…

.

.

.

ஆற்றில் வரத்தில்லை

கால்வாயில் கசிவில்லை

குளத்தில் இருப்பில்லை

கிணற்றின் ஊற்றுக்கண் திறப்பில்லை

.

விவசாயம் நாளும் சுயக்கொலை நடத்தும்

விதைத் தானியம்

இராக் கஞ்சி வெந்து கொண்டிருக்கும்

.

விளைச்சல் இல்லை

விளைந்தாலும் விலையில்லை

சிறுதொழில் தொடர வாய்ப்பில்லை

.

விசைத்தறி , குறுதொழில் , பட்டறை

காலால் மிதித்தோ

கையால் சுழற்றியோ

ஓட்டலாம் உடப்பில் தெம்பிருந்தால்

வருவாய் இல்லாமையால் வணிகமும் இல்லை

சாணம் இலாமையால் முன்றில் தெளிப்பும்

இல்லை மாதோ!

.

பிச்சை புகினும் வயிற்றுத் தீ

அணைக்க

சுவரும் கூரையும் அற்ற

நடைபாதை வாழ

.

சலோ சென்னை…

தருமமிகு சென்னைக்கு

தமிழ் வளர்க்கும் சென்னைக்கு

அறம் செழிக்கும் சென்னைக்கு

.

சலோ பாய்!

ஜல்தி சலோ!

~~~~~~~~~~~~~~~~~~~~~~~~~~~~~~~

.

.

.

குறிப்பு: கவிதையின் தலைப்பு தமிழில் இல்லாத காரணத்தால் , இதற்கு வரிவிலக்கு மறுக்கப்படுகிறது.

நன்றி: தட்டச்சு உதவி….பாலா.. சிங்கப்பூர்