நாஞ்சில் நாடன்

பேருந்து நிலையமெலாம்

திரை எழும்பும் கூலியினம்

.

இடுப்பில் ஒன்றெனில் கைவிரல்

மடிப்பில் மற்றொன்று

தலையில் சுமடமர்ந்த

பயணப் பொருள் மூட்டை

.

தெற்கின் சக உதிரம்

தெங்கெண்ணெய்த் தலையொழுக

ஊர் பார்த்து வழியேகும்

.

உமையாளின் மணநாளில்

தேவர் கனம் சமன் செய்ய

தெற்கே வழி மறந்த

குடமுனியும் வடக்கேகும்

.

காலை அதிரக் கனத்த வேட்டொலியில்

வாணத்து வெளிச்சத்தில்

பட்டாசும் பலகாரமும் வாங்கும்

கை நகத்தில் கிரீஸ் மணக்கும்

.

தீபாவளிக் கனவுதனில்

தலையணையில் வாயொழுக்கி

அறிதுயிலில் ஆழ்ந்திருக்கும்

அறியாத மதலை இனம்

.

செந்தமிழர் முன்றில் தொறும்

காரிருள் கலையுமுனம்

வண்ணச் சுண்ணத்தில்

Happy Divali

நடுவில் பூவாணம்

.

அரை நூற்றாண்டு ஆயிற்று

எரியாது அணைந்து ஒழிந்த

உதிரி வெடி பொறுக்கி

உல்லாச நடை நடந்து

.

ஈழத்தில் செத்தொழிந்த

எம்மினத்துப் பொடியர்க்கு

எத்தனையாவது திவசம் இது?

.

மீனுக்குள் கடல் கண்ட

தோழன் ‘ பாதசாரி ‘

துக்கத்தில் சொன்னதிது

காலத்தின் சுவை என்றும்

கண்ணீரின் உப்பு.

~~~~~~~~~~~~~~~~~~~~~~~~~

உயிர் எழுத்து

தட்டச்சு : பாலா. சிங்கப்பூர்