நாஞ்சில் நாடன்

முன் கதை: மிதவை

காத்தமுத்து, சண்முகத்தின் பக்கத்துப் படுக்கைக்காரன். அவன் சொன்னான்- ஒரு ஸ்டவ்வும் சில அத்யாவசியபாத்திரங்களும் வாங்கி வைத்துக்கொண்டால் பொங்கிச் சாப்பிடலாம் என்று. அல்லது ஏற்கனவே பொங்கிச் சாப்பிடும் குழுக்களில் ஒன்றில் சேர்ந்து கொள்ளலாம்.

          கொஞ்ச நாட்களைக் கவனித்த விஷயங்கள் ஞாபகம் வந்தது. ஸ்டவ் கொளுத்தி பாத்திரத்தில் தண்ணீர் வைத்து விட்டு அரிசியில் கல், நெல், நெல்மூக்கு, குதிரைவாலி பொறுக்கி, கழுவிப்போட்டால் அது வேகும். வெந்து கொண்டிருக்கும் வேளையில் உருளைக்கிழங்கை தோல்சீவி, வெங்காயம் அரிந்து, பச்சைமிளகாய்  வகிர்ந்து, புளி கொவரப்போட்டு புளிக்குழம்புக்கு ஆயத்தம். சோறு வடித்து இறக்கி விட்டு, சீனிச் சட்டியை அடுப்பில் ஏற்றி எண்ணெய்விட்டு, கடுகு தாளித்து கொத்துமல்லி, மஞ்சள், மிளகாய்ப்பொடி வறுத்து, வெங்காயம் சேர்த்து, புளித்தண்ணீரை ஊற்றி நுரைத்ததும் உருளைக்கிழங்கைப் போட்டு வெந்ததும் இறக்கிவிடலாம். ராத்திரிக்கும் மறுநாள் காலைக்கும் ஆகும். முட்டைக் கோசோ, பீன்ஸோ வாங்கினால் தேங்காய் போடாமல் துவரன். சில நாட்களில் சோறு மாத்திரம் பொங்கிவிட்டு எதிர்த்த கடையில் எட்டணாவுக்கு சாம்பாரோ, மீன்குழம்போ வாங்கலாம்.

          மாலையும் இரவும் இதற்கே சரியாகிப் போகும். சாப்பிட்ட பின் முறைவைத்து பாத்திரம் கழுவல். இது தோதுப்படும் என்று சண்முகத்துக்குத் தோன்றவில்லை.

          காத்தமுத்துவுடன் நட்பு போல் ஒன்று சமீப காலமாய் முளைக்க அரம்பத்திருந்தது.

          சண்முகத்தைவிட  இரண்டு மூன்று வயது குறைவாகவே இருக்கும். வி.டி.ஸ்டேஷனில் டிபார்ட்மென்ட் கான்டீனில் வேலை. அங்குமிங்கும் நாலைந்து ஓட்டல்களில் பெற்ற சர்வீஸூம், மேலப்பாறையூர் முத்துச்சாமி அண்ணாச்சியின் சிபாரிசும் வாங்கித்தந்த வேலை. எப்படிச் சம்பளம் ஆளை அயர்த்துகிற விதத்தில் இருக்கும்?

தட்டச்சு: பிரவீன்